من كام يوم بس حاجات بسيطة
ممكن تحصل ترجعك سنين من عمرك
ومع أول رائحة شهيه وأول ما هى وصلت البيت
كانت اكتشفت انها صينية البشاميل المُفضلة
ماما هييييييييييه أخيرا أكلتى المُفضلة
ماما بنظرة ثاقبة اه ما انتى اتأخرتى وبقيت محتارة
مين يشترى المكرونة وكنت هعاقبك ومش هعملها بس
الحمد لله اتصرفت ..فجأه بتنشكح جدا وامتى بقى آذان المغرب
هى كعادتها بتعشق الماضى مش بتزهق
زى كل سنة بتمر ناس كتير بتكون حواليك ومُفتقدهم
وناس مُش معاك بس عايشين جواك بتحبهم
اكتر من ناس كتير ..
ناس بتشوفهم فى كل حاجة بتعملها
تفتكر كل حاجة عشتها معاهم
بتسمع صوتهم جواك ,كلامهم
والأماكن اللى كنتوا فيها مع بعض
الأكل اللى بيحبوة تفتكر كان
ممكن يعملوا اية بس عشان تضحك
عشان تفرح وتكون مبسوط
ماقبل 2005 والسعاده اللى كنت عايش فيها
قبل ما تودع ناس وتبتدى تفارق طفولتك
احساسك بفقدان حد انت بتشوفه بشكل يومى فى كل حاجة
عايش معاك فى كل مكان و دايما تتذكره زى النور اللى ساكن جواك
روح نقية مُش بتنتهى عطرها عنبر
وما بعد 2005 تبتدى تشوف الدنيا وتقول
ياريتنى كنت معاكم بتبتدى تتعلق بماضيك
بتلعن الحاضر بتهرب منه
وبتضطر تعيش لحظاتك الحلوة اللى فى ماضيك
بتفوق على صوت الآذان واخيرا هناكل المكرونة البشاميل
بَهجة طفولية غير عادية لما بتكون فرحانة بأبسط حاجة ولو كلمة
بتقلب وشها ضحكاية متتعوضش ..
فى حياتك حاجات كتير سواء زمان او دلوقتى تستاهل تعيش علشانها
وحاجات حلوة لسة مش عشتها لازم تعيشها ..
بس لو الماضى بتاعك مُش مُبهج
نصيحة اتخلص منه واياك تعيش فية
اصلك هتحاول وهتتعب وهتمرض
ومش هتعيش ولا حاضر ولا مستقبل :))
ليست هناك تعليقات:
إرسال تعليق