عن الفيس بوك ..
حاليا الأكونت مُغلق ..
ادعولى بس أقدر أقاوم 24 ساعة من غير ما الفضول يقتلنى
المهم يعنى ان علاقتى بالفيس بوك تتلخص فى جملة واحدة ..
أنا لا بحبك ولا بقدر على بُعدك :D
الوضع أصبح مختلف حاليا الفيس بيحمل حاجات كتير
مهما حكينا مُش هنخلص من سلبياته والتطور و العفن اللى حصل واللى بيحصل..
الفيس من أول الأصدقاء..
إلا من رحم ربى :))
بداية هو أصبح عالم إفتراضى يعتمد على المُجاملات
وشوية توابل كده مُش حلوة ..
علاقتى ببعض الأصدقاء أصبحت بالشكل ده
ازيك .. عاملة اية ..الحمد لله .. دايما يارب..
وفى النهاية إيموشن ضحكاية أو قلب فوشيا أو بينك :D
انا نفسي مبقتش بحب التفاعل بالشكل ده بس بعض الناس هما بيجبروك تعمل كده !!
عن الــ seen
حاجة ممله أفسدت علاقات كتير من الناس
انا واحدة من الناس مش بتحب تحرج حد مثال لو حد بعت لى مسج أنا برد عليه
من الفريندز اللى موجودين عندي .. ولو على سبيل انى مش أحسسهم إنى بتجاهلهم
بالرغم ان المسج ممكن تكون مش تستدعى الرد أو تافهه ..
وعلى الجانب الآخر..أبعت أنا لحد مثلا .. seen اه وبعدين
وياسلام لو حاجة ضرورى بتبقى هيجيلك الشلل الرعاش !!
وخد عندك حجج للصبح وفيه اللى مش بيعبر أساساً ..
وفى الآخر ولا كأن حاجة حصلت :(
عن الإيموشن والفيلينج :D
العم مارك أبدع بصراحة لم يكتفى بالإيموشن المُعتاده ..لأ زادت وفاضت
وبَهتت وملينا منهم ..
وبالمناسبة إيموشن الضحكة اللى هى زى الضحكة الصفره دى :) مستفز جدااا
الفيلينج بقى .. عجبانى الصراحة بس المُضحك والمُبكي أنك تحسها إستخفاف بمشاعرك أوي
يعنى مثلاً .. لما عملت فى مره ola is feeling sick
مريضة بقى وكده .. شوف يا سيدي ألاقى كمية likes
إنى ألاقى سلامتك وربنا يشفيكِ .. لأ ..
الفكرة مش كده لأن أنت مش محتاج تسمع الكلمة دى
الفكرة أنك لو كنت كتبت ستايتس عادى مثلاً
أنا مريضة جدا ادعولى ربنا يشفينى ..
عمرى ما كتبت بوست زي ده :D
كنت هتلاقى عندك بقى .. مالك يا لولو
مالك يا حبيبتى .. إيه اللى حصل !!
وبلا بلا بلا من الأسئلة الفزيعة اللى تبهر الصراحة
متشنكرين يا جماعة بحبكم كلكم :D
انسوا الفيلينج انسوا
لأ تعالوا تانى كان قصدى من حوار الفيلينج ان المشاعر بتتلخص فى حاجات غريبة
ومش دايما بيحسوا بيك .. بس الفكرة فى انك محتاج فعلا لما تقابل صاحبك ده
فى الشارع تلاقى الضحكة منورة وشه فى وشك ومن جواه صافي مُش مرور الكرام :D
وإنه لما يقولك وحشتنى يكون قاصدها فعلا .. مش كلمة وبس :))
وإنه لما يبعتلك إيموشن قلب .. يبقى قلبة خالى من ناحيتك ومش شايل حاجات ياما
حتى لو فيه بينكم خلافات وإختلافات يا عم هتروق وهتروح بس هى مسألة وقت !
أنا قفلت الأكونت عشان أرتاح فتره مُش عارفة هقدر أقاوم وأكملها ولا لأ بس هحاول ..
عاوزة أبعد عن الفيس أخرج للواقع شوية أقابل ناس مختلفة
أشوف ضحكة حقيقية من القلب ولو من حد معرفوش ضحكه صافية
أشوف قلوب واضحة ونقية .. مُش قلوب مجروحه بتشكى جارحيها ليل نهار
عاوزة أقول لأصدقائي كمان صدقونى أنا نفسى أضحك زيكم ولما تكلموني مش تلاقونى متضايقة
بس الجو العام للحياه على الفيس .. مش طريق للبَهجة اللى تخلينى أضحك من قلبى
ساعات بتبقى ضحكتى fake فى مواقف معينة فـ بكرهها
وكل حاجة حواليا هي السبب .. بس هبعد هبعد هبعد يمكن ارجع بضحكة أحلى كتيير
لسه فيه عن الفيس حاجات كتير ودى مُش كل حاجة :))
نسيت أقولكم ممكن أفتح الفيس خمس دقائق بس أشير التدوينة هااااه O.o
يتبع !
